تاوەرەکانی فارێل ویلیامس ئاوازی گونجاویان هەیە

مۆسیقا و تەلارسازی هەندێک کات پێکەوە دێن، وەک ئەوەی کە Beyonce بیرۆکەی باڵەخانەیەکی دا، یان Kanye West هەوڵی پڕۆژەی خانووبەرەی دا. فارێڵ ویلیام (Pharrell Williams)، ئەوەی کە گۆرانی Happyەکەی هەیە، تازەترین نموونەمانە و بەشداری کردووە لە دیزاین کردنی دوو تاوەری نیشتەجێبوون.

پرۆژەی نیشتەجێبوونەکە ناوی "ناونەنراو"ە (untitled) و ویلیام تێیدا کاری لەگەڵ تەلارسازانی IBI Group و U31 کردووە. قورسە بزانین هونەرمەندەکە چەندە تێکەڵ بووە لە پڕۆسەی بنیاتنانەکە، گەرچی پێشتر سەنتەرێکی تری دیزاین کردووە. بەڵام باوەڕ ناکەین شەو تا درەنگ دانیشتبێت خەمی ژمارە و گۆشەکان بخوات.

IBI Group ڕوونیدەکەنەوە، "زوو لە پرۆسەکەدا بیرۆکەکەمان بۆ هات و کارمان لەگەل فارێڵا کرد بۆ هەڵبژاردنی گۆرانیەکی خۆی کە زۆر بۆی واتادارە. شەپۆلی دەنگی ئەو گۆرانیەشمان کرد بە شێوەی ڕووکاری بیناکە. ئەوەشی سەرنجڕاکێشە بچیتە هەر دیوێکی بیناکە بە شێوەیەکی جیواز دەردەکەوێت، ئەمە بەهۆی گۆرانیەکەوەیە کە هەڵمانبژارد: Gust of Wind."

لەو دوو تاوەرەی بنیاتدەنرێت، باکووریان 21 نهۆمی تێدا دەبێت بە بەرزی 76.9م، باشووریشیان 32 نهۆم بە بەرزی 108.54م. لە نێوان هەردوو بیناکەدا پردێک دەبێت بە دیمەنی دەورووبەرەوە، وە پێکەوە 751 خانوو دەگرنە خۆیان لە چەند ژووریەوە بۆ جێی نیشتەجێبوون بە سێ ژووری نووستنەوە. نرخەکان لە 400,000 دۆلاری ئەمەریکی دەستپێدەکەن و دەڕۆن بەرەو ژوور.

هەروەها وەک بەشێک لە پڕۆژەکە 413 بینا لە دەوری تاوەرەکان بنیاتدەنرێن و 200 خانووی هەرزان و نرخ گونجاو دەگرنە خۆیان. لەگەڵ ئەمانەش پارکێکی گشتی، سەنتەری تەندروستی، مەلەوانگە، باخچە و سەنتەری فیتنێس بنیاتدەنرێنە ناو پڕۆژەکەوە .

سەرچاوە : untitled